Կարճ ակնարկ հայկական պանրային խոհանոցի մասին

Հայաստանը համարվում է մի շարք հրաշալի պանիրների հայրենիքը։ Պանիրը հայկական խոհանոցի անբաժան մասն է․ այստեղ ամեն ինչ պանրով են ուտում։ Հացն ու պանիրը՝ համեմված տարբեր կանաչիներով համարվում է նախաճաշի լավագույն տարբերակներից մեկը։
Հայաստանը հիմնականում հայտնի է պանրի աղի տեսակներով՝ լոռին, չանախը, մոթալը, չեչիլը և այծի պանիրը ամենահայտնիներից են։ Այժմ կներկայացնենք նշված պանիրները, կխոսենք նրանց որակների և պատրաստման տեխնոլոգիաների մասին։  

Չանախ

Չանախը աղաջրում հասունացող հայկական ավանդական պանիր է։ Ասում են, որ պանրի բաղադրատոմսը ստեղծել են հովիվները դարեր առաջ։ Այն պատրաստվում է կովի կաթից, ունի նուրբ կոնսիստենցիա և ամբողջ մակերեսով ցրված մանր անցքեր։ Գույնը տատանվում է սպիտակից բաց դեղին։ Հասունացած պանիրը ունի աղի համ և յուրահատուկ բույր։ Պանիրը հասունանում է երկու ամսում։

Լոռի

Ինչպես կարելի է գուշակել անունից, լոռի պանրի հայրենիքն է համարվում Հայաստնի ամենագեղեցիկ մարզերից մեկը՝ Լոռու մարզը։ Մարզը տարիներ ի վեր հայտնի է պանրի պատրաստման իր տեխնոլոգիաներով։ Լոռին կիսափափուկ պանիր է՝ պատրաստված կովի պաստերացված կաթից, չունի կեղև, հասունանում է երկու ամսում։ Հասունացած պանիրն ունի աղի և թեթև կծու համ։

Մոթալ

Մոթալ պանիրը համարվում է Գեղարքունիքի մարզի այցեքարտը։ Ասում են, որ պանրի բաղադրատոմսը 5000 տարեկան է։ Հովիվները այն պատրաստել են դեռ դարեր առաջ և հիմա այն պանրի անհետացման եզրին կանգնած տեսակներից մեկն է, չնայած Հայաստանում քայլեր են ձեռնարկվում այն պահպանելու ուղղությամբ։
Այն պատրաստվում է ոչխարի կաթից և հասունանում մոտ 4-5 ամիս։ Մոթալը նաև պարունակում է հայկական լեռների ամենաանուշահոտ կանաչիների խառնուրդը, որը էլ ավելի համեղ է դարձնում պանիրը, որը ճաշակելիս դուք կզգաք Հայաստանի համը։

Չեչիլ

Չեչիլը անվանում են նաև հայկական սուլուգունի։ Այն պատրաստվում է կովի պաստերացված կաթից և քիչ կալորիական է։ Չեչիլը աղի է, հեշտ ծամվող և ծխեցված համ ունի։ Այն պինդ է և հարթ։ Պանիրը նաև անվանում են հյուսած կամ թել։ Պատրաստման գաղտնիքը այն ձգելու մեջ է, այնքան, որ դառնա թել-թել՝ հավի կրծքամսի նման։ 

Այծի պանիր

Եվ վերջապես, այծի պանիրը՝ որը պատրաստվում է այծի կաթից։ Այն հիմնականում հայտնի է և պատրաստվում է Վայոց ձորի մարզում։ Այծի պանիրն ունի աղի համ և անչափ յուրահատուկ բույր։

Ընդհանուր առմամբ, հայկական խոհանոցն առաջարկում է ավանդական պանիրների լայն տեսականի, որոնք համեղ են, ունեն յուրահատուկ բույր և ճաշակելիս հաճելի զգացողություններ են արթնացնում։ Փորձեք մեկ անգամ, և կրկին ու կրկին կցանկանաք փորձել դրանք։
Հուսով ենք, որ այս բլոգը կօգնի հասկանալ՝ հայկական պանրի որ տեսակն եք նախընտրում Դուք։ Բարի ախորժա՜կ։